Einki grindadráp fyribils í Hvannasundi

Menn eru á einum máli um meldaða grindadrápið, sum fór fram í Hvannasundi í fjør: Eingin misgerð er farin fram, og grindaformaður er sannførdur:

Eingin grind verður dripin í Norðoyggjum, fyrr enn greiði er komið á, hvat er upp og niður í málinum, sigur Louis Poulsen, grindaformaður.

Vanligt at goyma eina grind

Kenneth Justesen úr Hvannasundi var við í nógv umrødda grindadrápinum.

- Vit lógu á fjørinum og bíðaðu, tí Norðoyastevna var, og tað var ikki nokk av fólki at taka ímóti uppi á landi, so vit bíðaðu til kappróðurin var av, so kom fólkið norður. Alt fór fram, sum tað átti, sigur hann.

Sambært grindamonnum er ikki óvanligt at goyma eina grind. Tað vil siga, at ein grind liggur í fjørinum ella vágnið í nakrar tímar, áðrenn hon verður rikin inn ella út á sjógv aftur.

Ivi um lógarkarmarnar

Málið um grindadrápið í Hvannasundi er meldað sum djórapínsla, hevur fútin gjørt greitt í útvarpstíðindunum.

Hesum eru grindamenn ikki samdur við, og málið byrtir nú undir eina óvissu um lógarkarmarmarnar.

- Vit hava eina grindalóg í Føroyum, sum vit drepa grind eftir, og um vit ikki skulu brúka ta lógina, so mugu vit sum grindaformenn fáa tað at vita, sigur Louis Poulsen, grindaformaður.

Bíða eftir úrslitinum

Sambært grindaformanninum er bert eitt at gera nú, og tað er at bíða eftir niðurstøðuni.

- Nú bíða vit eftir myndugleikunum og vita hvat hendir.

Og til tá eru boðini greið:

- Eingin grind verður dripin í Norðoyggjum, fyrr enn vit fáa skil uppá, hvat hetta er fyri nakað tvætl, tey koma við, sigur Louis Poulsen, grindaformaður.

Heilsufrøðiligu Starvsstovuna hevur mett um málið, sum fútin kallar eitt mál um djórapínslu. Men tey vilja ikki gera viðmerkingar um málið.