Óli: - Sorlaðir sundur allan dystin

Elias Ellefsen á Skipagøtu fekk heiðurin sum dagsins spælari frá EHF, men í sjónvarpsstovuni hjá Kringvarpinum tóku Teitur Joensen og Rúni Joensen systkinabarnið Óla Mittún framum.

Kvirlivindurin í føroysku bakketuni var mestsum ógjørligur at steðga í løtum, og tað sást aftur á Óla Mittún, at hann hevði fingið harða viðferð. Føroyingarnir høvdu eisini hug at ilskast inn á linjuna hjá dómarunum onkra løtu.

 - Hetta var ein stuttligur dystur at spæla, má mann siga, frammanfyri so nógvum áskoðarum. Men mann má siga, at dómararnir lovaðu teimum rættuliga nógv til tíðir. Vit blivu so at siga sorlaðir sundur allan dystin, segði Óli Mittún.

Eftir at síða upp og síða niður hevur verið skrivað um økslina hjá Eliasi Ellefsen á Skipagøtu, var spælskiparin við frá byrjan, og hann og Óli Mittún funnu rætta frekvensin frá byrjan.

Føroyar fóru tí til hálvleiks tvey mál frammanfyri, og fyrstu løtuna í seinna hálvleiki, struku Føroyar undan. Eitt skifti vóru heili seks mál á muni. Sveis kom kortini sterkt aftur, meðan føroyingarnir vórðu ørkymlaðir - ikki minst inn á turkiska dómaraparið, sum tók nakrar ivasamar avgerðir.

Men tá tað sá út til at Sveis skuldi fara avstað við øllum, bjargaði Pauli Jacobsen, áðrenn Vilhelm Poulsen kundi javna.

 - Eg hugsi, at tað er trok, men eg trúgvi ikki, at teir tora at døma ímóti okkum enn einaferð, segði Óli Mittún, sum eisini viðgekk, at fleiri av avgerandi støðunum vóru torførar at døma.

Eftir stendur, at fyrsta EM-stigið á hesum sinni er komið á bók, og kjansurin at fáa fleiri kemur ímóti Montenegro. Óli Mittún hevur havt trupulleikar við hælsinuni, men hann vissaði føroyingar um, at hann er á vøllinum sunnudagin.