Teis: Kunnu vera ernir av avrikinum

Føroysku spælararnir vóru bæði vónbrotnir og kenslubornir eftir 30-27 tapið fyri Slovenia, sum merkti at Malmø og miðumfar ikki gjørdist veruleiki.

Teis Horn Rasmussen var ein teirra. Strikuspælarin harmaðist um úrslitið, men hann var eisini errin.

 - Hatta var ikki tað, vit høvdu ætlað, men yvirhøvur kunnu vit vera stoltir av avrikinum hjá okkum. Vit spæla væl til tíðir. Vit fáa eina góða løtu fyrst í seinna hálvleiki, sum vit vinna 5-2, men hatta er eitt fantastiska gott lið, segði Teis Horn Rasmussen eftir dystin.

 - So mangla vit nøkur prosentir eisini bæði offensivt og defensivt. Vit brenna skot, sum vit vanliga ikki kiksa upp á, og teir fáa onkrar uttaru síður. Ja, tungt.

Sveis hevði hølvað eitt hálvhjarta montonegrinskt landslið av við 17 málum í fyrra dystinum, og tí vistu føroyingarnir, at teir skuldu hava stig ímóti slovenum, um miðumfarið skuldi røkkast.

Teir stríddust allan dystin á tamb, men tað var í roynd og veru bert ta løtuna fyrst í seinna hálvleiki, tá Føroyar vóru á odda við tveimum, at Malmø hómaðist av álvara. Slovenia spældi væl, vardi hart, og hóast tað kostaði útvísingar og eitt reytt kort, megnaðu mótstøðumenninir at ørkymla føroyska álopsspælið.

 - Vit lærdu eina rúgvu, sum vit heilt víst skulu taka við okkum, helt Teis Horn Rasmussen, sum sera fegin hevði vilja sloppið at roynt seg ímóti Íslandi, Svøríki og hinum í miðumfarinum. 

 - Tað er nakað lort. Eg hevði væl tímað at spælt víðari. Vit kundu gott havt fýra dystir afturat í okkum, men vit komu her við greiða málinum um at vinna ein dyst. Tað kláraðu vit. Fingu eisini stig ímóti Sveis, sum vit eisini skulu vera ernir av.