André Olsen: Skulu arbeiða okkum burtur úr mótgongdini

HB fer at arbeiða seg burturúr mótgongdini, sum liðið upplivir í løtuni.

Tað sigur venjarin, André Olsen, eftir 2-0 tapið fyri KÍ í stórdystinum í Gundadali sunnudagin. Hetta er triði HB-ósigurin í Meistaradeildini higartil, og stórliðið er í vanda fyri at missa sambandi við oddin.

 - At tú tapir ein dyst, ella at tingini ikki ganga beint uppeftir alla tíðina er ein partur av fótbólti og lívinum, og tað, sum tað snýr seg um tá, er at arbeiða seg burturúr tí, og tað veit eg, at vit fara at klára, segði André Olsen.

André Olsen iðraði seg serliga um fyrra hálvleiki í Gundadali, har Filip Brattbakk og Oussama Ali skoraðu málini fyri KÍ. HB-venjarin var yvirhøvur betur nøgdur við avrikið eftir steðgin, men tað eydnaðist ikki at skora og hótta klaksvíkingar.

Úrslitið hevur við sær, at HB nú er sjey stig aftanfyri NSÍ, sum er fremst í Meistaradeildini við 17 stigum. KÍ og B36 hava bæði 15 stig.