Eiði legði sjógv til fyrstu ferð

Fyri fyrstu ferð yvirhøvur var kapping í kappróðri á Eiði. 

Tað hendi, tá seinnu Ódnartøkini vóru um vikuskiftið, og forkvinnan í Eiðis Kappróðrarfelag, Guðrun Ellingsgaard, heldur, at tað hevur týdning fyri unga felagið og bygdina sum heild.

 - Vit halda, at tað hevur sera stóran týdning at fáa eina nýggja ítróttagrein, so tað ikki bara er fótbóltur og hondbóltur, segði forkvinnan.

Fimm ára gamla felagið hevur tað gott og luttekur í kappróðrinum við tveimum FM-manningum og tveimum barnamanningum í summar.

 - Sjálvandi høvdu vit vilja havt Risan (8-mannafar) ella Hvalin (6-mannafar, menn) við, men tað lá ikki fyri í ár, men vit vóna, at teir koma við aftur komandi ár og kanska konufólk eisini, segði Guðrun Ellingsgaard.