- Tíðindi, mentan og ítróttur
Leivur: Elskar at koma heim at spæla fyri fullsettari høll
Leivur Mortensen var væl nøgdur við egið avrik eftir stórsigurin á Kosovo við Tjarnir í EM-undankappingini í kvøld, og tað hevði hann alla orsøk at vera.
Vinstri vongurin var sær sjálvum líkur og skoraði upp á øll seks skotini, sum hann royndi seg við. Eitt fór á stongina, men tá varð hann forðaður og vann í staðin Føroyum eitt brotskast.
- Vit eru bara glaðir fyri at sleppa heim at spæla fyri eini fullsettari høll. Tað elska vit, og áskoðararnir hjálptu eisini í dag, segði Leivur Mortensen eftir dystin.
Hann var væl nøgdur við, hvussu føroyingarnir høvdu taklað favorittleiklutin í 37-30 sigrinum, sum ongantíð var í vanda og eina løtu sá út til at gerast væl størri.
Hann fegnaðist eisini um, at tað eydnaðist vongmakkaranum Paula Høj at koma inn og skjóta sítt fyrsta A-landsliðsmál.
- Tú er bara glaður, tá hinir skora. Tú veitst ongantíð, nær tú verður skaddur ella hevur ein ringan dyst. So tú hopar bara fyri liðið og fyri Føroyar, at allir kunnu koma inn og gera sítt. Tað var deiligt, at Pauli kom inn og fekk mál í dag. Fantiastiskt, segði Leivur Mortensen.



























