Lea einaráðandi á stuttu teinunum

Sama um teinurin er 50, 100 ella 200 metrar. Sama um greinin er bringa ella frí.

Úrslitið er gull til Leu Osberg Højsted úr Ægi. Ella tað var tað í hvussu er til føroyameistarakappingina á langgeil, sum var í Havn um vikuskiftið.

 - Alt var ikki akkurát, sum tað skuldi, men eg kann bara vera nøgd, segði svimjarin eftir seinastu kappingarnar sunnudagin.

Lea Osberg Højsted telist millum evnaríku svimjararnar í Føroyum, og seinastu árini hevur hon sett eitt met fyri og annað eftir í bringusvimjing. Júst tað eydnaðist ikki hesa ferð.

 - Eitt sindur, skuffandi, men tú kanst ikki altíð seta met. Eg ætlaði mær kanska at koma undir bestu tíð í bringu, men hetta er eisini ein venjing til EJM, sum er um ein mánað, so tað verður spennandi, um eg klári at toppa tá, segði Ægir-svimjarin.

Hon stóð seg væl í frísvimjingini og var eisini við til at seta føroyskt met í miksstafettini í 4x100 metur frí saman við Johannu Ólavsdóttir, Heina Mohr Askham og Líggjasi Joensen.