Tosar føroyskt akkurát sum einki

Í síðstu viku fingu fólk úr øllum heraðshornum, sum nú búgva í Føroyum, prógv í føroyskum sum annaðmál.

Gie Johannessen var ein av teimum fyrstu at taka hesa lærugreinina fyri góðum tíggju árum síðani, og í dag tosar hon málið raðið.

Kom til Føroya í 2014

Gie Johannessen flutti til Føroya úr Filipsoyggjunum fyri tólv árum síðani, og hon avgjørdi tá beinanvegin at fara í holt við at læra málið.

Sum ein av teimum fyrstu fór hon at læra seg føroyskt á kvøldskúlanum. Í 2014 teknaði hon seg aftur til undirvísingina, og bað tá mannin um bert at tosa við seg á føroyskum, og tað hjálpti nógv.

- Eg haldi, at tað er týdningarmikið at vera partur av samfelagnum, og tað kemur við at skilja málið, segði hon í innslagi í Dagur og viku fríggjakvøldið.

Málið opnar hurðar

Hetta hevur tó als ikki verið lætt, sigur Gie Johannessen. Serliga hevur tað verið torført at benda orð, og so hevur tað heldur ikki verið heilt lætt at vita, nær kallkyn og kvennkyn eru rætt at brúka.

Men tað hevur verið tað vert, spyrt tú Gie Johannessen. Tí áðrenn hon dugdi málið, hevði hon ilt við at fáa arbeiði, henni dámdi, og í dag hevur hon lært málið so mikið væl, at hon starvast sum avloysari í socialpsykiatriini, og tað ger hon á jøvnum føti við aðrir starvsfelagar.