Ikki greitt hvat heimið skal brúkast til

Eftir at hava átt tað í meira enn trý ár, slapp Eik Banki av við Sjómansheimið í Runavík fríggjadagin.

Keyparin, smápartafelagið Toft, hevur ikki gjørt av, hvat stóri bygningurin skal brúkast til. Men ymsir møguleikar eru, sigur Joen Magnus Rasmussen í Leirvík, sum sjálvur fimti hevur keypt gamla sjómansheimið.

Sjómansheimið, sum varð vígt í mars 1970, er 294 fermetrar í trimum hæddum, og loftið er 227 fermetrar. Grundstykkið er 1435 fermetrar. 25 kømur eru í sjómansheiminum, og har kundu gista 43 fólk.