Nærum ógjørligt at taka støðu til tilmælini

Tilmælini frá ávíkavist Havstovuni og Fiskidaganevndini um fiskidagatal eru so ymisk, at tað er nærum ógjørligt hjá politikarunum at taka støðu til.

Tað sigur Helgi Abrahamsen, sum vil hava skipanina broytta.

Fiskidaganevndin mælir til sama fiskidagatal sum í fjør, og metir, at botnfiskastovnarnir eru óvanliga væl fyri. Samstundis heldur Havstovan í sínum tilmæli uppá, at støðan í fiskivinnuni er hættislig, og at serliga stovnarnir av hýsu og toski mugu metast at vera í undantaksstøðu.

Fiskidaganevndin er mannað av umboðum frá fiskiflotanum, og byggir sína meting á eina samrøðukanning við fiskimenn. Havstovan, sum hevur til uppgávu at halda eyga við fiskastovnunum, byggir sína meting á yvirlitstrolingar og náttúruvísindaligar kanningar. Havstovan mælir til ein niðurskur av fiskidøgunum upp á 25%, til stovnarnir eru komnir fyri seg aftur.

Mynd: Helgi Abrahamsen, løgtingsmaður