Reiðaríið vil hava sáttmála fyri Anitu

Reiðaríið hjá garnaskipinum, Anitu, vil gera sáttmála við Fiskimannafelagið um manningina á skipinum.

Tað sigur Sørin Christiansen, reiðari.

Tveir fundir hava verið við Fiskimannafelagið og fundur verður aftur í næstu viku, sigur hann.

Jan Højgaard, formaður í Fiskimannafelagnum, váttar, at partarnir tosa saman, men enn er ikki greitt um sáttmáli verður gjørdur við reiðaríið, sigur hann.

Reiðaríið hevur serligan sáttmála við skiparan, Heina Reinert.

Manningarfeløgini hava heitt á myndugleikarnar um at taka veiðiloyvið frá Anitu. Tað málið liggur á borðinum hjá Kaj Leo Holm Johannesen, løgmanni. Eitt mál ímóti skipinum er í rættinum. Skiparin er skuldsettur fyri seks brot á kunngerðina um garnaveiðu.