Vit hava selt russum laks fyri 224 mió. kr. í ár

Føroyski laksaútflutningurin til Russlands er vaksin í kjalavørinum av politisku kreppuni millum Rusland og ES.

Sambært tølum frá Hagstovuni útfluttu Føroyar laks fyri 39 milliónir krónur til Russlands í 2013 og fyri 224 milliónir krónur higartil í ár.

Tað merkist eisini á Bakkafrosti, har sølan av feskum laksi er vaksin munandi í ár samanborið við í fjør

Hinvegin er útflutningurin til ES minkaður nógv, tí marknaðurin er undir trýsti úr Noregi, sum seldi 130.000 tons til Ruslands, áðrenn handilsbannið ímóti ES londum varð sett í verk.