Nú skulu øll gjalda fyri at brúka samferðslukervið

Stendur tað til landsstýrismannin í samferðslumálum, skulu øll gjalda fyri at nýta samferðslukervið, eisini tey, sum ikki beinleiðis gjalda fyri at brúka vegir, tunlar og brýr.

Arbeitt verður við einari samhaldsfastari loysn, har øll gjalda eitt sindur, sigur Henrik Old, landsstýrismaður.

Hetta verður eisini nevnt í samgonguskjalinum.

Landsstýrismaðurin ætlar at fáa eina breiða semju í løgtinginum um nýggju gjaldsskipanina, og eydnast tað, verður eitt uppskot lagt fyri tingið í hesari tingsetuni.