Noyðist helst at skipa minnilutastjórn

Erna Solberg, forsætisráðharri, noyðist helst at skipa eina minnilutstjórn, nú Kristiligi fólkaflokkurin hevur boðað frá, at hann fer ikki at styðja eina stjórn, har Framburðsflokkurin er við.

Tað sigur Jógvan Hugo Gardar, tíðindmaður í Oslo, eftir stórtingsvalið í Noregi í gjár.

Borgarligu flokkarnir varðveita stjórnarvaldið, og Erna Solberg hevur boðsent øllum fýra flokkum á fund um møguleikarnar at skipa stjórn.

Men Kristiligi fólkaflokkurin vil ikki vita av Framburðsflokkinum, og tí er ikki óhugsandi, at Høgriflokkurin skipar stjórn einsamallur, ella saman við Framburðsflokkinum, sigur Jógvan Hugo Gardar.