Mangla eldrasambýli á Tvøroyri

Tørvurin á eldrasambýli á Tvøroyri er so stórur, at kommunan má keypa ella leiga bygningin, har sambýlið við Sílá helt til. Tað heldur Javnaðarflokkurin í Tvøroyrar býráði, sum hevur biðið um eyka býráðsfund.

Tvøroyar kommuna má keypa ella leiga bygningin, har sambýlið við Sílá helt til, so eitt sambýli aftur verður á Tvøroyri.

Sambýlið við Sílá fór í ódnini í 2011. Tvøroyrar kommuna seldi sambýlið eftir tað. Síðani hava tey, ið keyptu bygningin, bygt hann uppaftur, og hann er gjørdur, so at hann kann brúkast til sambýli. Bygningurin er nú lýstur til sølu.

Javnaðarflokkurin hevur heitt á borgarstjóran á Tvøroyri um kalla inn til eyka býráðsfund beinanvegin um málið.

Bjarni Hammer, býráðslimur, sigur, at sambýlið við Sílá er við gleppa úr hondunum á býráðnum. Hann heldur, at norðara helvtin á Suðuroynni hevur tørv á eldrasambýli. Býráðið keypir ella leigar sambýlið, og síðani kann bygningurin leigast út til heimatænastuna, sum tekur sær av rakstrinum, sigur Bjarni Hammer. 

- Raksturin vil koma frá heimatænastuni, men Tvøroyrar kommuna noyðist at keypa ella leiga sambýlið, tí Bú- og Heimatænastan megnar tað ikki í løtuni, sigur Bjarni Hammer. 

Hoyr samrøðu við Bjarna Hammer omanfyri.