Væntar ein meiriluta fyri uppskotinum

Sonja Jógvansdóttir, uttanflokkatingkvinna, dylir ikki fyri, at hennara atkvøða bara fæst, um hon fær síni fingramerki á uppskotið, hon er als ikki hoyrd, segði hon í løgtinginum í gjár.

- Hvussu ætla landsstýriskvinnan í fíggjarmálum og løgmaður at telja upp í 17? Eftir arrogansuni at døma skuldi man trúð, at stuðulin aftan fyri fíggjarlógina var eini 18-20 tinglimir, men hyggur tú eftir veruleikanum, so tykist tað ikki sum um, at man í løtuni kann telja upp í 17, segði hon á løgtingsins røðarapalli í gjár. 

Í fjør varð avtala gjørd við Sjálvstýri, áðrenn fíggjarlógaruppskotið varð lagt fyri tingið, men í ár hevur samgongan valt at gera tað á øðrvísi hátt, sigur Aksel V. Johannesen, løgmaður. 

- Um vit hyggja eftir okkara grannalondum, har tað er vanligt við minnilutasamgongum, verður fíggjarlógaruppskotið lagt fram fyrst, og síðani verður samrátt um uppskotið við ymsar partar, sigur Aksel V. Johannesen millum annað um støðuna. 

Sambært løgmanni hevur samgongan verið í samráðingum við bæði flokkar og uttanflokkatingfólk í løgtinginum um fíggjarlógaruppskotið, og løgmaður er bjartskygdur um møguleikan at fáa meiriluta. 

- Vit halda, at vit fara nokk at klára at tryggja 17 atkvøður fyri einum fíggjarlógaruppskoti og vónandi meira enn tað, segði løgmaður fyrrapartin við útvarpið. 

Løgmaður vil tó ikki nágreina, júst hvønn samgongan hevur verið í samráðingum við. 

Hoyr samrøðuna, sum Beinta Løwe hevði við løgmann omanfyri.