Tríggir vatnskaðar á Glasi

Nýggi og stásiligi skúlabygningurin í Marknagili í Havn er ikki klárur at lata uppaftur fyri næmingum og lærarum, nú heystfrítíðin er av og gerandisdagurin á Glasi annars skuldi byrja aftur mánadagin.

Í dag boðar rektarin Bogi Bech Jensen frá, at skúlagongdin byrjar ikki aftur fyrr enn hósdagin.

Í heystfrítíðini hevur verið arbeitt við at gera bygningin lidnan innan. Men arbeiðið hevur ikki gingið eftir vild, og er seinkað. Tí hevur Landsverk, sum er byggiharri, biðið um at fáa tríggjar arbeiðsdagar afturat í næstu viku.

Arne Debes Madsen, leiðari á Byggideildini hjá Landsverki, upplýsir, at hesa vikuna hava ikki færri enn tríggir vatnskaðar seinkað arbeiðnum. Talan er tó ikki um stórar skaðar, men smærri arbeiðsóhapp, ið tó samanlagt seinka arbeiðnum nógv.

Bogi Bech Jensen, rektari á Glasi, sigur at leiðslan í næstu viku fer at leggja undirvísingina soleiðis til rættis, at tað mista verður vunnið innaftur.

-Tað er eingin skandala, at vit missa tríggjar undirvísingardagar nú. Vit vilja heldur koma aftur til ein betri skúla, tá handverkararnir eru lidnir, og so leggja vit kabalina soleiðis, at næmingarnir fáa sína undirvísing kortini, sigur Bogi Bech Jensen.

Sambært rektaranum skulu næmingarnir tó ikki óttast at noyðast í skúla leygardag, hóast tey nú missa tríggjar undirvísingardagar.

Trýst á pílin undir myndini fyri at hoyra samrøðu við Arna Debes Madsen, leiðara á Byggideildini hjá Landsverki.