Fingið lyfti um hjálp at gera brimgarðar aftur

Ein loysn er á veg fyri brimgarðarnar, sum fóru illa í ódnarveðri í vár.

Brandur Sandoy, løgtingsmaður og samgongulimur, segði undir 2. viðgerð av fíggjarlógini í gjár, at hann góðtekur ikki fíggjarlógina, so leingi sum einki er sett av til at umvæla brimgarðar.

Men nú er líkt til, at broytingar verða gjørdar millum 2. og 3. viðgerð.

Ein møguleiki, sum hevur verið nevndur, er at stovna vanlukkugrunn, sum kommunur kunnu søkja stuðul úr, tá ódnarveður elvir til stóran skaða á eitt nú brimgarðar.

Í Húsavík verður skaðin mettur til níggju milliónir krónur, sum svara til tríggjar álíkningar hjá kommununi.

3. viðgerð av fíggjarlógini fyri 2021 verður í morgin.

Hoyr samrøðu við Brand Sandoy í útvarpstíðindunum.