- Tíðindi, mentan og ítróttur
Fara møguliga at seta føðing í gongd fyrr

Sum nú er, verður føðingin sett í gongd, tá ið kvinnur hava gingið tvær vikur yvir tíð. Men burðarlæknar og serlæknar í kvinnusjúkum, vilja seta ein arbeiðsbólk at kanna, um ein vika skal vera markið. Tað skrivar DR.
Forkvinnan í felagnum fyri danskar burðarlæknar og serlæknar í kvinnusjúkum, Hanne Brix Vestergaard, sigur, at alt bendir á, at tað burdi verið broytt.
Hon vísir m.a. á svensku granskingina, sum varð gjørd her fyri, tá ið seks børn doyðu, áðrenn granskingin varð steðgað. Tá varð roynt at lata barnakonur ganga longri enn tveir vikur yvir tíð.
Í Svøríki er tilmælið nú broytt, soleiðis at kvinnur bert ganga eina viku yvir tíð.
Men ikki øll eru samd um at stytta tíðina. Tveir granskarar á Aarhus universiteti halda ikki, at tað er rætt.
Tær meta ikki, at færri børn verða deyðfødd, um tíðin verður stytt, og harafturat kann tað elva til trupulleikar fyri móður og barn at verða sett í gongd, tí hjáárin eru av heilivágnum, sum verður nýttur at seta í gongd við.
Í Danmark verða umleið 15.000 barnakonur settar í gongd um árið, meðan talið hækkar upp í umleið 19.500 barnakonur, um tíðin verður stytt eina viku.
Ein arbeiðsbólkur fer eftir ætlan at kanna, um tað eru fleiri fyrimunir ella vansar við hesum, og tilmælið verður í fyrsta lagi klárt síðst í 2020.


























