Ikki neyðugt at broyta kommunustýrislógina

Kommunustýrislógin verður ikki broytt, tí hon er greið.

Helgi Abrahamsen, landsstýrismaður, hevur enn einaferð svarað Heðini Mortensen, løgtingsmanni, um farloyvi hjá kommunustýrislimum.

Hugtakið at fara í farloyvi er ikki til í kommunustýrislógini.

Men lógin hevur ásetingar um tiltakslimir, segði Helgi Abrahamsen fyrr í hesum mánaðinum.

Politisk avgerð

Heðin Mortensen spurdi tá landsstýrismannin, um tað var politisk avgerð at broyta siðvenjuna um farloyvi hjá kommunustýrislimi brádliga beint fyri jól í fjør. Gunvør Balle, býráðslimur í Tórshavnar kommunu, var í farloyvi, men hon kom kortini á býráðsfund.

Og tað hevði hon rætt til, tí eingin regla forðar einum kommunustýrislimi at møta á býráðsfundi, hóast viðkomandi er í farloyvi, segði Kommunala eftirlitið í einum svari til Tórshavnar býráð.

Helgi Abrahamsen vísti til donsku kommunustýrislógini, sum er fyrimynd hjá teirri føroysku.

Men Heðin Mortensen tulkar kommunustýrislógina øðrvísi enn Helgi Abrahamsen.