Skervur verður dýrari í Sandoynni

Skervur fer ikki at kosta tað sama í Sandoynni sum aðrastaðni í landinum.

Skervurin verður fluttur í Sandoynna. Og tann flutningskostnaðurin verður lagdur oman á prísin.

Jørgen Niclasen, landsstýrismaður, hevur svarað Brandi Sandoy, løgtingsmanni, sum spurdi um prísin á skervi í Sandoynni.

Landsverk gavst í 2018 við grótbrotinum við Krókafoss á Sandi, tá tunnilsfelagið tók við grótbrotinum.

Goymsla í Skopun

Nú verður skervur fluttur í Sandoynna á goymslu í Skopun.

Bara sjálvur skipsflutningurin í Sandoynna verður lagdur oman á prísin á skervi. Annars kostar hann tað sama sum aðrastaðni í landinum, sigur Jørgen Niclasen.

Eingin ætlan er um at broyta hetta, sigur hann.

Brandur Sandoy sigur, at skervurin er 23 prosent dýrari í Sandoynni enn aðrastaðni í Føroyum.