Viðgera nú flúgvingina hjá Atlantsflogi

Flogfarið, sum skuldi fara úr Vágum til París, klokkan 12:30, er avlýst. Samstundis er heimferðin úr París til Vágar í kvøld eisini avlýst.

Tað stendur á heimasíðuni hjá Atlantic Airways. Annars tykist flogferðslan til og úr Danmark enn at ganga, sum vant.

Leiðslan í Atlantic Airways fór fyrrapartin á fund við Fíggjarmálaráðið at taka støðu til, hvat skal henda við ferðafólkunum úr Danmark, sum hava pláss umborð á Atlantsflogi í dag.

Fundast um flogferðsluna úr Danmark

Jóhanna á Bergi, stjóri í Atlantic Airways, sigur í stuttari viðmerking, at tey framvegis fundast við myndugleikarnar um, hvussu tey skulu tolka støðuna, eftir at myndugleikarnir í gjárkvøldið settu Danmark á reyðalista.

Eitt flogfar hjá Atlantic Airways fór í morgun úr Vágum til Keypmannahavnar.

Eitt flogfar hjá SAS úr Kastrup Floghavn skuldi væntandi lenda í Vágum nú klokkan 12:20, og um tvey tíðina lendir eitt flogfar hjá Atlantic Airways úr Kastrup. Í kvøld væntast eitt flogfar úr Keypmannahavn.