Mælir til at avmarka ferðing til Schengen-lond

ES-nevndn skjýtur nú upp, at tað skal ikki verða loyvt at ferðast til lond, sum eru í Schengen-samstarvinum. Skotið verður upp, at forboðið verður galdandi í ein mánað, men at tað kan verða longt, gerst tað neyðugt.

Forkvinnan í ES-nevndini, Ursula von de Leyen, sigur, at tað skal framvegis bera til at ferðast ótarnað millum Schengen-lond.

- Tess minni ferðing, tess skjótari kann virusið avmarkast, sigur hon.

Á henda hátt ber til at verja seg fyri, at virusið ikki breiðir seg, og samstundis tryggja vit okkum, at vørur koma fram, skrivar forkvinnan í ES-nevndini á Twitter.

Undantøk

Hon mælir tó til, at undantøk verða gjørd. Tey skulu galda fyri fólk, sum hava búð í ES í longri tíð, skyldfólk hjá ES-borgarum, diplomatar, læknar og granskarar, sum royna at finna loysnir á kreppuni.

Allir ES-borgarar skulu framvegis kunna ferðast í ES-londum, skrivar Ritzau.

ES-leiðararnir skulu góðkenna uppskotið, sum kemur til viðgerðar á einari video-ráðstevnu millum ríkis- og stjórnarleiðararnar í ES í morgin.