Hasfjord fer í sigling 8. mai

Nú er greitt, at Hasfjord fer í farmasigling um Skopunarfjørð 8. mai. sum er Dýra biðidag.

Hasfjord hevur fingið nýggja róðurmaskinu setta í, so farmaferjan kann manurera betur.

Strandferðslan sigur á heimasíðuni, at fyribils ferðaætlan fyri Hasfjord verður lýst fyrst í næstu viku.

Kom 20. februar

Hasfjord, sum skal flyta tungan farm í Skopunarfirði, kom til Føroya 20. februar. Skipið hevur ligið á Havnini síðani.

Royndarsiglingin vísti, at neyðugt var at fáa róðrið at virka skjótari, tí ferjan skal snara um seg sjálvt bæði í Skopun og á Gomlurætt.

Nú er nýggj róðurmaskina sett í skipið, og tað verður sett í sigling 8. mai. Skipasmiðjan Mest hevur gjørt arbeiðið.