Avlopið minkaði í 2019

Bíligari ferðaseðlar, dýrari brennievni, ein nýggj flogruta og minni leiga gjørdu, at Atlantic Airways hevði eitt verri ár í fjør enn í 2018.

Avlopið í fjør var bara 7,8 mió. kr. eftir skatt, hóast ferðafólkini vóru tíggju prosent fleiri í fjør enn í 2018. Í 2018 var avlopið 16,2 milliónir krónur krónur eftir skatt.

Inntøkurnar fóru úr 547 milliónir krónur í 2018 upp í 574 milliónir krónur í 2019. 

338.000 ferðafólk í fjør

Gjaldførið hjá Atlantic Airways var 142 milliónir krónur við árslok 2019. Tá árið byrjaði hevði felagið 148 milliónir krónur í tøkum peningi. 

Ferðafólkini vóru 338.000 í fjør, og tey hava ongantið verið so nógv. Yvir 40 prosent vóru útlendingar.

Á aðalfundinum hjá Atlantic Airways varð staðfest, at útlitini fyri 2020 eru vánalig. Stór óvissa er um, nær flúgvingin av álvara fer í gongd aftur.

Tveir nýggir nevndarlimir

Fyribils til síðst í juni verður flogið tríggjar ferðir um vikuna millum Vágar og Kastrup. Á aðalfundinum í gjár vórðu Gunn Ellefsen og Esther Dahl valdar í nevndina.

Laila Hentze og Fróði Magnussen vóru í nevndini. Niels Mortensen heldur fram sum nevndarformaður og Kaj Johannessen sum næstformaður í nevndini hjá Atlantic Airways.

195 ársverk vóru í felagnum í fjør. Tey kostaðu 126,4 milliónir krónur. Landsstýrið fær einki vinningsbýti, tí tað stendur í lógini frá 2014, tá landið keypti aftur privatu partabrøvini í Atlantic Airways.