Lógaruppskot verður broytt til áheitan á løgtingið

Uppskotið til samtyktar um ikki at loyva mismuni á arbeiðsmarknaðinum vegna aldur er nú broytt til at verða ein áheitan á løgtingið um at biðja landsstýrið koma við lógaruppskoti, sum bannar mismuni og tryggjar javnviðgerð á arbeiðsmarknaðinum.

Javnaðarflokkurin og Tjóðveldi, sum eiga uppskotið, hava sjálvi broytt tað, so tað verður meira umfatandi.

Uppskotið verður broytt í einum broytingaruppskoti hjá minnilutanum í Rættarnevndini hjá løgtinginum.

Strika 70 ára markið

Meirilutin í nevndini, umboðini hjá samgonguni, tekur ikki undir við uppskotinum um mismunin vegna aldur, tí landsstýrið ætlar at strika 70 ára aldursmarkið á almenna arbeiðsmarknaðinum.     

Og í samgonguskjalinum stendur, at aldurin eigur ikki at vera avgerandi fyri, nær farið verður av arbeiðsmarknaðinum. Tænastumannalógin og aðrar forskriftir verða broyttar samsvarandi. 

Meginreglan er, at førleikin og ikki aldurin skal avgera, nær farið verður av arbeiðsmarknaðinum.