Ókeypis kanningar halda fram

Ferðandi kunnu av somu orsøk vænta drúgvari bíðitíð, tá ið tey koma til landið. 

Heilsumálaráðið heitir á øll ferðandi um at fara beinleiðis í heimauppihald, til tey hava fingið svar upp á kanningina, svarið kemur sum oftast sama kvøld og í seinasta lagi á middegi dagin eftir.

Við at lata upp fyri ferðing til Føroya, økist eisini smittuvandin, skrivar ráðið og heitir á øll um at minnast til frástøðuna og góða reinførið. 

Fyribils galdandi til 31. juli

– Okkara samfelag er lítið og viðbrekið, og tí er umráðandi, at framvegis hava fyrilit so at vit fyribyrgja smittubreiðslu, sigur Heilsumálaráðið í tíðindaskrivi seinnapartin.

Ráðið hevur skrivað undir nýggjar sáttmálar við Thetis og Smyril Line um koronukanningarnar, soleiðis at kanningarnar av ferðafólki framhaldandi verða gjørdar á besta og tryggasta hátt, sum ráðið orðar seg.

Samstarvssáttmálarnir eru galdandi frá 11. juli til og við 31. juli, og møguleiki er fyri leingja hesar fram til 16. august 2020.