Hava tikið drekan uppaftur

Drekin, sum bleiv settur út í Vestmannasundi at gera orku úr sjóvarfallinum, er tikin upp á land aftur.

Mekaniskir trupulleikar eru við festinum millum drekan og fundamentið, sigur SEV.   

Brekið verður nú rættað, og so verður drekin settur útaftur.

Annars er arbeiðið við verkætlanini at gera streym úr sjóvarfallinum í Vestmannasundi komið væl áleiðis.

Kaðalin, sum skal føra elorkuna inn á land, er lagdur og bundin í transformarastøðina á Oyrargjógv, so samband nú er millum orkuverkið í sundinum og elnetið.