Russisku sjómenninir telja ikki við longur

Tá koronutølini vórðu dagførd í morgun, vóru framvegis 413 fólk staðfest at vera smittað. Men nú eru 409 staðfest at vera frísk aftur.

Tí nú telja teir 29 tilburðirnir um borð á russiska trolaranum Yantarnyy ikki við longur.

Teir eru farnir av listanum, nú 14 dagar eru farnir, síðani teir komu á listan.

103.000 kanningar gjørdar

Vanligt er, at fólk, sum heilsumyndugleikarnir ikki hava samband við, fara av koronulista, tá tey hava verið har í 14 dagar, sama, um tey eru vorðin frísk ella ikki.

Eitt fólk er á Landssjúkrahúsinum, men tað er ikki á intensivari deild. Og nú eru sjey fólk í sóttarhaldi. 102.850 kanningar eru gjørdar í Føroyum. 

Yantarnyy liggur enn í Nólsoyarfirði. Føroyskir heilsumynduleikar hava ikki verið um borð á trolaranum aftur, síðani hann lá á Oyrareingjum.