Rættarnevndin biður um longda freist

Rættarnevndin hjá løgtinginum ger nógv burtur úr uppskotinum til samtyktar hjá Javnaðarflokkinum um at stytta arbeiðsvikuna.

So nógv, at nevndin nú hevur biðið um longda freist at avgreiða málið.

Rættarnevndin hevur biðið løgtingsformannin um freist til 20.oktober. Uppskotið fekk fyrstu viðgerð 3.september. Freistin at koma við áliti var tí til 3.oktober.

Rættarnevndin hevur viðgjørt málið á fýra fundum og hevur tosað við umboð fyri 15 feløg og myndugleikar.

Nevndin gjørdi av á seinasta fundi, sum var 28.september, at skriva álit. Men hetta arbeiði er ikki liðugt enn, og tí biður nevndin um longri tíð.