Kina fyrireikar seg til kríggj

- Nýtið alla tykkara orku til at fyrireika tykkum til kríggj.

Tað vóru boðini frá kinesiska forsetanum, Xi Jinping, tá hann í morgun vitjaði eina herstøð í Guandong-landspartinum.

Forsetin hevur eftirlit við fólksins heri, sum kinesiski herurin verður nevndur, og sambært kinesisku tíðindastovuni, Xinhua, heitti forsetin á hermenninar um at vera í størstu tilbúgving.

67 ára gamli forsetin er undir stórum trýsti, bæði tá talan er um støðuna í landsynningspartinum av Asia, men eisini mótvegis stórveldunum, India og USA.

Taiwan fær ilt i amerikanarar

At Kina ger alsamt meir um seg í Hongkong, hevur fingið ilt í amerikanarar, sum eisini finnast hvassliga at kinesisku ætlanini um at innlima Taiwan í Kina.

- Nýtið alla tykkara orku til kríggj, men vísið virðing, og verið trúfastir ímóti landinum, segði hann við hermenninar á herstøðini, sambært CNN.

USA hevur lovað Taiwan vápn, og tað fanst kinesiski uttanríkisráðharrin hvassliga at. Og Kina sendi mánadagin 40 hernaðarflogfør til leiðirnar við Taiwan.

Sambæst CNN hevur Xi Jinping fleiri ferðir hótt við at taka valdið í Taiwan, og landið fær ikki sjálvstýri, hevur hann gjørt greitt.

Kina hevur meir enn tværmilliónir hermenn.

Stríð um Kashmir

Stríð er eisini millum Kina og India um markið í Kashmir-landspartinum.

Í juni vóru bardagar, og sambært myndugleikunum í India, lógu 20 indiskir og 43 kinesiskir hermenn eftirá. Kina hevur ikki váttað tíðindini.

Stríð hevur veriðum markið í 60 ár, men hetta var fyrstu ferð í 45 ár, at hermenn doyðu.

Støðan hevur fingið bæði londini at senda nógv herfólk og útgerð til markið.