Evropeisk lond herða koronutiltøkini

Matstøð og skeinkistøð hava fingið boð um at lata aftur, men børnini sleppa í skúla. Tiltøkini í Týsklandi koma í gildi mánadagin.

Angela Merkel, samveldiskanslari, sigur, at talan er um strong tiltøk, men tey eru neyðug, tí smittan breiðir seg skjótt, og í 75 prosentum av førunum vita myndugleikarnir ikki hvaðani smittan kemur.

Handlar kunnu hava opið, men hvørt fólk skal hava 10 fermetrar av plássi. Angela Merkel segði, at týska heilsuverkið kann fáa trupulleikar, um smittan veksur so skjótt sum nú.

Útigongubann í Fraklandi

Týsku myndugleikarnir hava kunngjørt, at seinasta samdøgrið eru næstan 15.000 fólk smittað, og tað er met.

Í Fraklandi eru yvir 36.000 fólk smittað seinasta samdøgrið. Har hevur forboð fyri at vera úti um kvøldið og náttina verið galdandi í fleiri av stóru býunum.

Tað hevur ikki verið nóg mikið, og tí hevur franski forsetin boðað frá, at allar matstovur og skeinkistøð steingja frá í morgin. Franski forsetin sigur, at hendan aldan av koronu er ógvusligari enn tann fyrra, og fer at krevja meir, skrivar The Guardian.

Sjúkrahúsini fyllast í løtuni

Í Fraklandi sleppa fólk ikki út, uttan so at talan er er um neyðug viðurskifti, ella at ganga ein túr í ein tíma.

Heimsheilsustovnurin, WHO, sigur,at smittan nú ger mest um seg í Europa, og tí mugu londini taka neyðug stig, fyri at steðga smittuni.

Talskvinnan hjá WHO, Margaret Harris, sigur, at nú byrja sjúkrahúsini at fyllast við sjúklingum, og tað er ein keðilig gongd, skrivar BBC.