Ávarar um harðskap og blóðbað

Iranski forsetin, Hassan Rouhani, ávarar um, at tann, sum ger Mohammed profet firtnan, kann uppliva harðskap og blóðbað.

Ávaringin kemur eftir, at stríðið um keipumyndir er kyknað aftur. 

Hassan Rouhani tosaði í iranskum sjónvarpi um Frakland, sum vil verja rættin at prenta keipumyndir av Mohammed.

Franskir myndugleikar verja henda rættin, eftir at ein lærari í søgu, sum hevði víst næmingunum keipumyndir, varð skorin á háls.

Ómoralskt

- At fornerma profetin er ikki einki avrik, tað er ómoralskt. Tað eggjar til harðskap. Og tað var óvæntað, at tað skuldi koma frá teimum, sum siga seg verja mentan og frælsi, - at tey, uttan at vita tað, eggja til harðskap og blóðbað, segði Rouhani ígjár.

Eftir at lærarin var dripin, hevur franski forsetin, Emmanuel Macron, við greiðum orðum vart rættin til at finnast at átrúnaði gjøgnum keiputekningar. 

Tað fall ikki í góða jørð í fleiri muslimskum londum.

Rouhani sigur, at vesturheimurin má skilja, at ger tú profetin firtnan, fornermar tú allar muslimar.