Føroyskur dansur er livandi siðaarvur

Føroyskur dansur er livandi mentan og siðaarvur.

Sláið Ring, landsfelag føroyskum dansi at frama, hevur søkt um at fáa føroyska dansin tiknan upp í skránna yvir livandi siðaarv í Føroyum.

Og nú er hann komin í skránna, sigur Uttanríkis- og Mentamálaráðið.

Skráin Livandi mentan kom, tá Føroyar tóku undir við UNESCO sáttmálanum um at verja siðaarv. Tað var í 2018.

Endamálið við sáttmálanum er at fáa fólk í øllum heiminum at seta orð á sín egna siðaarv og á tann hátt tryggja, at siðaarvurin ikki verður gloymdur.