Stór útskifting helst á veg

Líkt er til, at stór útskifting verður í nevndini hjá SEV í næstum. Bara ein av sjey nevndarlimum varð afturvaldur á kommunuvalinum. Fýra stillaðu ikki uppaftur.

Tey eru Jónsvein Hovgaard, umboðandi Suðuroynna, Vinjard Tungá umboðandi Sandoynna, Marin Katrina Frýdal umboðandi Tórshavn og Kristian Eli Zachariassen, umboðandi Norðuroyggjar.

Tveir limir stillaðu upp aftur, men fullu. Hesir eru John Zachariassen, umboðandi Streymoynna og Hans Jákup Johannesen umboðandi Eysturoynna.

Einasti nevndarlimur í SEV, sum varð afturvaldur, er Sune Jacobsen, sum gjørdist síðstvaldur í Sørvágs Kommunu.