Bretar byrjaðir at koppseta fólk

Bretland er fyrsta landið í vesturheiminum, sum hevur góðkent koppingarevni frá Pfizer/BioNTech. Í síðstu viku byrjaðu russar eisini eitt koppseta við teirra egna Sputnik V-koppingarevni.

Í fyrstu atløgu vera tað fólk yvir 80 ár, bú- og starvsfólk á ellis- og røktarheimum, umframt starvsfólk í heilsuverkinum, sum verða koppsett, siga bretsku myndugleikarnir.

Bretska heilsuverkið hevur fyribils fingið 800.000 skamtar av koppingarevninum frá Pfizer/BioNTech. Hetta er nokk til 400.000 fólk, tí koppingarevnið skal gevast í tveimum, við trimum vikum ímillum.

Trupult at handfara koppingarevnið

Koppingarevnið skal goymast við minus 70 stigum, og hetta hevur havt avbjóðingar við sær, tí hetta ger tað torført at flyta koppingarevnið, skrivar BBC.

Sambært danska TV2, so ætlar bretski heilsumálaráðharrin, Matt Hancock, at ganga á odda við at vísa álit á nýggja koppingarevnið, og hann skal eftir ætlan koppsetast í beinleiðis sjónvarpi.

Heilsuverkið í Bretlandi vónar at koppseta tey flestu fólkini í vandabólkum fyrst í 2021, og ávarar tí um, at verandi smittuverndartiltøk vera galdandi í eina tíð aftrat, hóast tey í dag byrja at koppseta.