Gav einki lyfti um ókeypis koyring í tunlunum

Fundurin í Klaksvík í gjárkvøldið við valfeløgini hjá Sambandsflokkinum og Fólkaflokkinum í Norðoyggjum um tunnilsgjaldið var eitt vónbrot hjá valfeløgunum. Løgmaður gav einki lyfti um, at tað skal vera ókeypis at koyra í tunlunum.

Sambært løgmanni er málið als ikki viðgjørt politiskt, og einki bendir á, at tað verður viðgjørt enn á sinni.

– Eg fari ikki at lova nakað, og tað vistu tey eisini væl frammanundan, sigur Bárður á Steig Nielsen. 

Sambært Mariu Olsen, forkvinnu í Norðoya Sambandsfelag, sum var á fundinum, hava feløgini avtalað einki at siga eftir fundin. Atli Rasmussen, næstformaður í Sambandsfelagnum, vísir eisini til Bárð á Steig Nielsen.

Tríggjar krónur

Ein túrur í tunlinum kostar í dag 20 krónur báðar vegir, um tú hevur hald. Tú fært tó tað mesta aftur frá TAKS.

Við at søkja um endurgjald, fært tú átta krónur og 45 oyru fyri hvønn túrin í endurgjaldi, tó í mesta lagi fyri tveir túrar um dagin. Samanumtikið rindar tú gott og væl tríggjar krónur fyri túrin. 

Øll tey lokalu valfeløgin í Norðoyggjum vóru undan fundinum samd um, at tíðin er komin til at avtaka gjaldið. Sambært Norðoya Tjóðveldisfelag skal tað gerast við skili, og ein meira gjøgnumhugsað samferðsluskipan skal gerast fyri alt landið.