Kvinnuhúsið fær 800.000 kr.

Kvinnuhúsið fær nú 800.000 krónur í fíggjarligum styrki.

Talan er um fæið í "Fonden af 1989 for sociale formål på Færøerne."

Stýrið í hesum grunni gjørdi fyrr í ár av at taka grunnin av, tí mett varð, at grunnurin ikki longur kann lúka  endamál sítt.

Samstundis gjørdi stýrið av, at fæið skuldi latast Kvinnuhúsinum, hvørs endamál samsvarar væl við endamálið hjá grunninum. Grunnaeftirlitið hevur nú góðkent, at tað verður gjørt.

Ann-Britt Fríðheim Mortensen, leiðari í Kvinnuhúsinum, er takksom fyri gávuna. 

- Hetta kann bøta um umstøðurnar hjá kvinnum og børnum, ið hava verið fyri likamligum ella sálarligum harðskapi, sigur hon.