Gamalt mál um stinglaks aftur í rættin

Eitt tað elsta málið í rættarskipanini stendur aftur í listanum hjá Føroya rætti fríggjadagin.

Men talan er bara um fyrireikandi fund fyri at vita, hvat støðan er í málinum nú.   

Málið er frá 2014.

Thor og BankNordik stevndu

Reiðaríið Thor og BankNordik hava stevnt Fiskimálaráðnum, tí eitt skip hjá Thor ikki fekk eitt royndarloyvi at fiska stinglaks.

Thor keypti síðst í 2009 djúpvatnstrolaran Phoenix frá Føroya Banka, sum keypti skipið á tvingsilssølu 25.november í 2008.

Í bankanum og í Thor hildu tey, at Phoenix hevði royndarloyvi at fiska stinglaks. Vanligt er, at fiskiloyvi eru við, tá skip verða seld á tvingilsuppboði.

Einki royndarloyvi til

Men har var einki royndarloyvi at fiska stinglaks. Tí vilja Thor og BankNordik hava endurgjald frá Fiskimálaráðnum og hava Fiskimálaráðið at viðurkenna, at avgerðin um at strika royndarloyvið er ógildug.

Phoenix hevði saman við tveimum øðrum skipum royndarloyvi at fiska stinglaks, áðrenn hann fór á tvang.