Jenis og Trine hava talgildan fund um radaran

Klokkan 11:30 í morgin fara danski verjumálaráðharrin, Trine Bramsen, og Jenis av Rana, landsstýrismaður í uttanríkismálum, á fund, har tey millum annað skulu umrøða málið um møguliga nýggjan radara á Sornfelli.

Ætlanin var, at Trine Bramsen skuldi koma til Føroya á kurteisisvitjan og hava fund við Jenis av Rana 3. januar. 

Men koronustøðan gjørdi, at hesin fundurin varð av ongum. Trine Bramsen hevur ikki vitjað í Føroyum, síðani hon gjørdist ráðharri.

Talgildur fundur

Fundurin í morgin verður talgildur, men tó ikki sum vanligur talgildur fundur. Mál av trygdarpolitiskum týdningi skulu umrøðast, og tað kann ikki gerast gjøgnum vanliga telefon ella netsamband.

Tí verður fundurin hildin í serligum trygdarrúmi hjá Arktisk Kommando, sum hevur serliga samskiftisútgerð. Arbeitt verður við at gera eitt slíkt rúm í Tinganesi, men tað er ikki liðugt enn.

Sambært Jenisi av Rana, landsstýrismanni, er tað Trine Bramsen, ið hevur biðið um fundin í morgin. Jenis av Rana sigur, at hann vil hava ítøkiligar upplýsingar um radaran á Sornfelli og støðuna í Arktis.