Um 40 ár vera 57.455 fólk í Føroyum

Í desember 2060 búgva 57.455 fólk í Føroyum. Tað vísir ein framrokning hjá Hagstovuni.

Tá fara 46,1 prosent av fólkinum at búgva í Tórshavnar kommunu.

Fólkatalið veksur líðandi til desember 2056, tá tað fer at minka aftur.

Í desember verður fólkatalið 53.573.  

2.000 fleiri menn

Fólkatalið verður framroknað við kanna, hvussu nógv eru fødd, hvussu nógv eru deyð, hvussu nógv eru flutt til Føroya, og hvussu nógv eru flutt úr Føroyum síðani 1985. 

Framrokningin vísir, at eisini um 40 ár eru okkurt um 2.000 fleiri menn í Føroyum enn kvinnur.

Aldursbýtið fer at broytast nógv.

Fleiri fólk, sum eru 40 ár ella eldri, vera í 2060 enn nú. Nú eru tey 48,7 prosent. Í 2060 vera tey seks prosentstig fleiri.

Í 2060 vera 141 menn í aldursbólkinum 95 ár til 99 ár og 224 kvinnur, siga framrokningarnar hjá Hagstovuni.