Fríkend fyri báðar ákærurnar

Kvinnan, sum var ákærd fyri at hava útvegað nýggja arbeiðsplássi sínum kappingarfyrimunir við at brúka upplýsingar um sáttmálar hjá fyrrverandi arbeiðsgevaranum, og fyri herverk, er fríkend fyri bæði. 

Føroya rættur kunngjørdi dómin í dag.

Grundgevingin hjá dómaranum er, at ákæruvaldið er ikki komið við upplýsingum, sum kunnu skjalfesta, at sáttmálarnir, sum kvinnan sendi til sín sjálvs, eru brúktir til at geva sær sjálvari kappingarfyrimun.

Í úrskurðinum verður eisini víst á, at fyritøkan hevði ógreiðar reglur í sambandi við at senda skjøl til privatar teldupostbústaðir. Tað er ógreitt, um tað er í lagi ella ikki, at starvsfólk senda skjøl til sín sjálvs.

Eisini fríkend fyri herverk

Kvinnan var eisini ákærd fyri at hava tømt harðdiskin á teldu síni, stutt eftir at hon hevði sagt seg úr starvi.

Men heldur ikki í hesum førinum fekk ákæruvaldið viðhald. Kvinnan er fríkend fyri ákæruna um herverk.

Í úrskurðinum verður sagt, at løgreglan fekk telduna ov seint til at kunna siga, hvat er gjørt við telduna. Teldan hevði eisini verið til umvælingar, og tí kann ikki ávísast, hvør hevur verið á telduni.

Verjin, Jógvan Elias Winther Poulsen, kravdi frídøming. 

Mads Strandberg Petersen, fulltrúi hjá ákæruvaldinum, sigur, at ákæruvaldið umhugsar, um málið skal kærast.