Sunda kommuna fær vinnu- og umhvørvisnevnd

Sunda kommuna hevur fingið eina nýggja nevnd, vinnu- og umhvørvisnevnd.

Undanfarna býráð samtykti hálvan desember í fjør at stovna nevndina og broyta kommunustýrisskipanina, so til bar at stovna nevndina.

Av tí at fíggjarætlanin fyri 2021 longu varð gjørd tá, er neyðugt við eykajáttan til nýggju nevndina.

115.000 kr. um árið

Fimm fólk eru í nevndini, og nevndin kostar 115.000 kr. um árið.

Býráðið hevur samtykt at játta pengarnar. Ein viðgerð er eftir, tí talan er um eykajáttan.

Esther Dahl er forkvinna í Vinnu- og umhvørvisnevndini.

Í nevndini eru eisini Kári Matthíasson, Haraldur S. Hammer, Rúni Kruse og Ingolf Joensen.