Dagpengatrygging loftar eisini tónleikarum

Dagpeningatryggingin loftar eisini tónleikarum, sum missa inntøkur sum sjálvstøðugt vinnurekandi. Tað sigur Elsebeth Mercedis Gunnleygsdóttir, sum hevur svarað spurningum frá Bjørt Samuelsen, løgtingskvinnu.

Fólk fáa í mesta lagi 960 krónur um dagin, íroknað frítíðarløn, í dagpengum um dagin. Sjálvbodna tryggingin tekur við, tá ið til dømis tónleikarar hava sera sveiggjandi inntøku.

Landsstýriskvinnan sigur seg ikki vita um sjálvstøðug vinnurekandi, sum hava teknað trygging, sum detta niðurímillum. Og tónleikarar eru ikki verri tryggjaðir enn aðrir yrkisbólkar í dagpeningaskipanini. 

Sjálvbodna tryggingin er ein skipan, sum skal lofta teimum, sum ikki hava nóg góðar umstøður eftir vanligu reglunum um dagpengar. Til ber at tryggja seg fyri sjúku og fáa 960 krónur um dagin í dagpengum frá fyrsta sjúkradegi.