Nýggjur stjóri í Arktisk Kommando

Arktisk Kommando fær nú nýggjan stjóra. Tað er Martin La Cour-Andersen, sum kemur úr einum starvi sum verjufulltrúi í Washington.

Tað skrivar grønlendski miðilin, Sermitsiaq, í dag.

Fyrrverandi stjórin, Kim Jørgensen, fór frá um miðjan desember, tá hann fór í nýtt starv hjá danska verjumálaráðnum. Hann hevði tá verið stjóri í Arktisk Kommando síðani 2016.

Danskur verjuráðgevi í NATO og ES

Martin La Cour-Andersen er føddur í 1963, er giftur og hevur trý børn. Hann hevur millum annað verið verjufulltrúi á donsku sendistovunum í Madrid, London og seinast í Washington, og hevur eisini verið danskur verjuráðgevi í NATO og ES. Hann tekur við nýggja starvinum 1. juni.

Millum uppgávurnar hjá Arktisk Kommando er hernaðarlig verja av Føroyum og Grønlandi, fiskiveiðieftirlit, umhvørvisvernd og leiting og bjargingartænasta.

Høvuðssætið er í Nuuk.