BankNordik útlutar 700 milliónir til eigararnar

BankNordik ætlar at útluta 700 milliónir krónur í eyka vinningsbýti til eigararnar. Tað eru 73 krónur fyri hvørt partabrævið í bankanum.

Av teimum 700 milliónunum skulu 450 milliónir krónur útlutast í ár, og 250 milliónir útlutast í 2022 og 2023. 

Orsøkin til stóra, eyka vinningsbýtið er, at bankin nú hevur selt alt sítt virksemi í Danmark. 

Landskassin eigur, umvegis Fíggingargrunnin frá 1992, ein triðing av BankNordik. Tí fær landskassin smáar 240 milliónir í eyka vinningsbýti frá bankanum.

Gyltur aðalfundur

BankNordik hevur aðalfund í morgin. Frammanundan hevur aðalfundurin skotið upp at útluta fimm krónur í vinningsbýti fyri hvørt partabrævið í bankanum. Tað gevur tilsamans 48 milliónir krónur í vinningsbýti til eigararnar.

Tær 48 milliónirnar eru stívliga 29 prosent av yvirskotinum í fjør, sum er gjørt upp til 166 milliónir krónur.

Nú koma so 700 milliónir krónur afturat í eyka vinningsbýti úr bankanum til eigararnar.

Nevndin skift út

Undan aðalfundinum í morgin er greitt, at bara verandi nevndarformaður í BankNordik, Ben Arabo, og Jógvan Jespersen, stjóri í Felagnum Nótaskip, halda fram í nevndini fyri BankNordik.

John Henrik Holm, Barbara P. Vang, Gunnar Nielsen og Hans Arni Bjarnason Thomsen hava boðað aðalfundinum frá, at tey stilla ikki uppaftur.

Nakrir av størstu eigarunum í BankNordik - Fíggingargrunnurin frá 1992, Lind Invest ApS, Protector Forsikring ASA, P/F Tjaldur og P/F Framherji - skjóta upp at velja Sverre Bjerkeli, Jóhonnu Lava Køtlum og Michael Ahm í nevndina.

Sverre Bjerkeli er úr Norra. Hann er stjóri í Protector Forsikring. Michael Ahm er úr Danmark. Hann er adjunktur við Handilsháskúlan í Keypmannahavn. Jóhanna Lava Køtlum er stjóri í Fiskaaling. 

Sambært viðtøkunum skal aðalfundurin velja millum fýra og seks nevndarlimir. Tey vóru seks frammanundan, eftir aðalfundin vera tey fimm. Harumframt eru trý starvsfólkavald umboð í nevndini.