Keyptu klæðir og skógvar sum ongantíð

Korona tykist ikki at ávirka keypihugin hjá føroyingum.

Hinvegin benda tølini á, at handlar, sum hava við smásølu, hava havt úr at gera, vísa tøl hjá Hagstovuni.

Føroysku húsarhaldini keyptu keyptu nógv meira av vanligum gerandisvørum annan, triðja og síðsta ársfjórðing í fjør, enn sama tíðarskeið í 2019.

Størsti vøksturin í fjórða ársfjórðinginum var í vørubólkunum klædnavørur og fótbúnaður, har umsetningurin vaks 20 prosent.

Um føroyingar keyptu sær meira jólastás til jóla 2020 enn til jóla 2019, siga tølini onki um

Skerdir møguleikar at keypa uttanlands

Men korona hevur millum annað havt við sær, at møguleikar at keypa jólagávur uttanlands, hava verið munandi skerdir í 2020 samanborið við undanfarin ár.

Hetta er ivaleyst ein orsøk til, at føroyingar keyptu nógv meira klæðir og skógvar í Føroyum ennl sama tíðarskeið í 2019, sigur Hagstovan.

Tað varð eisini selt meira av húsbúnaði og húsarhaldsútgerð í fjórða ársfjórðingi í fjør. 15 prosent meira enn sama tíðarskeið í 2019.

Sølan av matvørum og alkoholfríum drykkjuvørum var 11 prosent størri seinasta ársfjórðingin í fjør, enn um somu tíð fyrraárið.

Samanumtikið er eftirspurningurin eftir klædnavørum og fótbúnaði, húsbúnaði og húsarhaldsútgerð, og mati og alkoholfríum drykkjuvørum í miðal vaksin 10 prosent frá 2019 til 2020, vísa tølini hjá Hagstovuni.