Fáa tvær milliónir at umvæla havnarløg

Hvalbiar og Húsavíkar kommunur fáa nú tvær milliónir kr. í hjálp til at umvæla havnarløg, brimverjur og annað, sum fór í ódnarveðrinum seinast í februar í fjør.

Tær báðar kommunurnar eru beinleiðis nevndar í eykajáttanaruppskotinum, sum kom í tingið í gjár.

- Hetta var tað, sum semja fekst um í løgtinginum, sigur Jørgen Niclasen, landstýrismaður í fíggjarmálum.

Níggju milliónir kr.

Seinast í mars fekk Hvalbiar kommuna tilboðini um at umvæla brimverjuna, sum fekk skaða fyri góðum ári síðani. Tað bíligasta tilboðið var upp á knappar níggju mió krónur. Tað var munandi minni enn upprunaligu kostnaðarmetingarnar.

Landsverk hevur mett, at skaðarnir í Húsavíkar kommunu fara eisini at kosta umleið níggju mió krónur.

Hoyr innslag í útvarpstíðindunum.