Vilja hava markið hækkað upp í 25 prosent

Fiskivinnuráðið tekur undir við, at tað aftur verður loyvt at landa ein part av veiðuni uttanlands. Men 15 prosent er ov lítið. Fiskivinnuráðið heldur, at markið eigur at vera 25 prosent.

Verður markið bara 15 prosent, er vandi fyri, at møguleikin ikki kann nýtast, tí tá skal hvørt skipið hava eina rímiliga stóra kvotu, áðrenn tað loysir seg at landa eina last uttanlands og gagnnýta hendan møguleikan.

Jacob Vestergaard, landsstýrismaður í fiskivinnumálum, ætlar, at føroysk skip skulu sleppa at landa 15 prosent av veiðuni uttanlands.

Heimildin er í lógini um veiðigjøld

Sjófeingislógin ásetir annars, at øll veiða hjá føroyskum fiskiskipum skal landast í Føroyum. Tað er lógaruppskotið um veiðigjøld, sum er orsøkin til broytingina.

Sambært lógaruppskotinum um veiðigjøld skal veiðigjaldið á uppsjóvarfisk ásetast eftir miðal avreiðingarprísunum árið fyri.

Við at loyva skipunum at landa 15 prosent av veiðuni uttanlands, verður mett, at tað fer at tryggja prísásetingina í Føroyum.

Fiskivinnuráðið mælir í sínum hoyringarsvari til at finna eina javnvág millum ymsu áhugamálini í fiskivinnuni, so aftur verður loyvt at landa í minsta lagi 25 prosent av veiðuni uttanlands.