Fleiri skulu sleppa at gera heildarætlan

Fleiri enn tey fimm arkitektavirkini, sum Mentamálaráðið hevur undangóðkent, eiga at sleppa at gera heildarætlan um eystara havnarøki í Havn í sambandi við, at tjóðleikhús skal byggjast har.

Tað samtykti Tórshavnar býráð einmælt hósdagin.

Heðin Mortensen kom við uppskotinum.

Fíggingin skal fyri býráðið aftur, samtykti býráðið eisini.

100.000 kr.

Upprunaliga uppskotið var annars, at tey fimm ráðgevaratoymini, sum eru knýtt at kappingini um tjóðleikhúsið, fáa 100.000 krónur hvørt til at finna røttu staðsetingina og samstundis byrja at gera eina heildarætlan fyri eystara havnarøkið.

Við hesum leisti fær býráðið fimm uppskot um, hvussu økið skal skipast, og hvar tjóðleikhúsið skal vera.

Umsitingin kom við hesum uppskoti, og Byggi- og býarskipanarnevndin, Tekniska nevnd, Havnarnevndin og Fíggjarnevndin tóku undir við tí.

Men á býráðsfundinum hósdagin kom borgarstjórin við broytingaruppskotinum um, at fleiri skulu sleppa framat at koma við uppskotum um eystara havnarøki.